२ माघ,२०८२ काठमाडौं – जल तथा मौसम विज्ञान विभागले हाल नेपालमा कुनै उल्लेखनीय मौसम प्रणालीको प्रभाव नरहेको जनाएको छ। विभागका अनुसार देशका अधिकांश भू–भागमा मौसम सामान्य अवस्थामा रहेको छ। हाल तराई भू–भागका केही स्थानहरूमा तुवाँलो लागेको छ भने पहाडी तथा हिमाली भू–भागमा मौसम मुख्यतया सफा रहेको छ।

विभागले आज दिउँसो र राति तराई भू–भागका केही स्थानहरूमा हुस्सु तथा कुहिरो लाग्ने सम्भावना रहेको जानकारी दिएको छ। यस्तै, कोशी प्रदेश र सुदूरपश्चिम प्रदेशका उच्च पहाडी तथा हिमाली भू–भागमा आंशिक बदली रहनेछ भने बाँकी भू–भागमा मौसम मुख्यतया सफा रहने अनुमान गरिएको छ।

जल तथा मौसम विभागले तुवाँलो र हुस्सुका कारण विशेषगरी बिहान र रातको समयमा सवारी साधन चलाउँदा सावधानी अपनाउन आग्रह गरेको छ।