२० चैत,२०८२ काठमाडौं – सरकारले अटिजम भएका बालबालिकाको शिक्षामा पहुँच विस्तार गर्ने उद्देश्यसहित सातै प्रदेशमा नमुना आवासीय विद्यालय स्थापना गर्ने निर्णय गरेको छ। शिक्षा, विज्ञान तथा प्रविधि मन्त्री सस्मित पोखरेलका अनुसार उक्त योजना कार्यान्वयनका लागि प्रत्येक प्रदेशमा अटिजम विद्यालय कार्यान्वयन समिति गठन गरिएको छ। उनले समितिहरू मार्फत विद्यालय स्थापना प्रक्रियालाई व्यवस्थित र प्रभावकारी बनाइने जानकारी दिए।

मन्त्री पोखरेलले कार्यक्रमलाई सफल बनाउन अन्तर मन्त्रालयबीच समन्वय बढाइएको र आवश्यक प्राविधिक समिति समेत गठन गरिएको बताए। उनका अनुसार कार्यान्वयन प्रक्रियालाई तीव्रता दिइएको छ र छिट्टै ठोस उपलब्धि देखिने अपेक्षा गरिएको छ।

सरकारको यस निर्णयलाई अटिजम भएका बालबालिकाको शिक्षामा सुधार ल्याउने महत्वपूर्ण कदमका रूपमा हेरिएको छ।