१३ साउन २०८३ काठमाडौं – नारायणी अस्पतालमा चिकित्सक तथा स्वास्थ्यकर्मीमाथि भएको आक्रमणको विरोधमा नेपाल चिकित्सक संघले आह्वान गरेको आन्दोलनका कारण दोस्रो दिन पनि देशभरका अस्पतालमा आकस्मिकबाहेकका सबै स्वास्थ्य सेवा बन्द रहेका छन्।

आन्दोलनका कारण ओपीडी, नियमित स्वास्थ्य परीक्षण, शल्यक्रियालगायत सेवाहरू ठप्प हुँदा उपचारका लागि अस्पताल पुगेका धेरै बिरामी सेवा नपाई फर्किन बाध्य भएका छन्।

वीरगञ्जस्थित नारायणी अस्पतालमा चिकित्सकमाथि भएको आक्रमण र अस्पतालमा गरिएको तोडफोडमा संलग्न दोषीलाई कानुनी कारबाही गर्न सरकार उदासीन बनेको आरोप लगाउँदै नेपाल चिकित्सक संघले आन्दोलनलाई निरन्तरता दिएको जनाएको छ।