असोज १०, २०८२ काठमाडौं– नेपाल वायुसेवा निगमको खर्चमा चीनको ग्वान्झाउ जान लागेको ३९ सदस्यीय नेपाली टोलीको उडान अन्तिम समयमा स्थगित भएको छ। गएराति १० बजे उडान तालिका तय भए पनि बोर्डिङ पास वितरण पछि उडान स्थगित गरियो र टोलीलाई होटलमा राखिएको छ।

उडान स्थगित हुनुको कारण औपचारिक रूपमा नखुलाए पनि चीनको नागरिक उड्डयन प्राधिकरणबाट अनुमति नआएकाले उडान रोकिएको स्रोतले जनाएको छ। स्थगित उडान शुक्रबार दिउँसो साढे १ बजेका लागि सारिएको निगमले जनाएको छ।

उक्त भ्रमणमा पर्यटन मन्त्रालय, निगमका पदाधिकारी, ट्राभल व्यवसायी, कलाकार र पत्रकार सम्मिलित छन्। टोलीले चार दिनको भ्रमणपछि सेप्टेम्बर २९ मा फर्कने कार्यक्रम छ।

सरकारी खर्चमा गरिँदै गरेको भ्रमणको आलोचना समेत भएको छ, विशेषगरी सरकारले खर्च कटौतीको नीति अघि सारेको समयमै यस्तो भ्रमण हुन लागेको हो।