श्रावण २१ ,२०८२ काठमाडौं – ११ करोड रुपैयाँभन्दा बढीको ठगी आरोप लागेका सिप्रबी सेक्युरिटिजका महाप्रबन्धक जयन्त श्रीवास्तव काठमाडौं महानगरीय प्रहरी परिसरमा स्वयं उपस्थित भएका छन्।

शेयर कारोबारी दीपेन्द्र अग्रवालले विभिन्न व्यक्तिका नाममा सेयर कारोबार गराएर भुक्तानी नदिएको भन्दै उजुरी गरेपछि श्रीवास्तव प्रहरी कार्यालय पुगेका हुन्।

काठमाडौं प्रहरी परिसरका अनुसार, मिता मुरारका अग्रवाल र ज्योति अग्रवाल नाम गरेका व्यक्तिहरूले आफूहरूलाई बुझाउनुपर्ने ११ करोड ५५ लाख रुपैयाँ नपाएको भन्दै ठगी सम्बन्धी जाहेरी दिएका थिए।

प्रहरी अनुसन्धानअनुसार, दीपेन्द्र अग्रवालले १५ जनासम्मका नाममा सेयर किनबेच गर्दै स्व-व्यवस्थित मूल्य वृद्धि गराउने र त्यसपछि सामाजिक सञ्जालमार्फत सर्वसाधारणलाई लगानी गर्न प्रलोभन दिने गरेको प्रमाण भेटिएको छ।

उक्त ब्रोकर कम्पनीले दीर्घकालीन भुक्तानी नगरेको भन्दै ठगी आरोप लागेको हो। श्रीवास्तव प्रहरीमा आफैं पुगेपछि घटनासम्बन्धी आवश्यक अनुसन्धान अघि बढाइएको प्रहरी स्रोतले जनाएको छ।

प्रहरीका अनुसार, श्रीवास्तवलाई हिरासतमा राखेर अनुसन्धान गर्न जिल्ला अदालतको अनुमति आवश्यक पर्ने हुँदा सो निर्णयपछि थप कारबाही प्रक्रिया तय गरिनेछ।