काठमाडौँ: इजरायल र प्यालेस्टाइनबिच ११ दिनसम्म चलेको हिंसात्मक द्वन्द्वमा अस्थायी विराम लागेसँगै मध्यस्थकर्ताहरुले स्थायी समाधानको खोजी सुरु गरेका छन्।

गएको शुक्रबारदेखि युद्धविराम लागु भएसँगै प्रभावित सर्वसाधारण घर फर्किन तथा आफ्ना भत्किएका संरचना स्याहारमा जुटेका छन्। मानवीय सहायता सामग्री गाजा पुग्ने क्रम सुरु भइसकेको छ।

मध्यस्थकर्ताहरु स्थायी शान्तिको खोजी र आउँदा दिनमा हिंसा नभड्कियोस् भन्नका लागि प्रयासमा छन्। वार्ताका लागि मध्यस्थता गरिरहेको इजिप्टको टोली शनिबार इजरायल पुगेको छ। यस्तै अमेरिकी विदेश मन्त्री एन्टोनी ब्लिङ्कनले आउँदो हप्ता सो क्षेत्रको भ्रमण गर्ने सम्भावना रहेको छ।

मे १० देखि सुरु भएर ११ दिनपछि रोकिएको युद्धमा आफ्नो जित भएको दाबी इजरायल र गाजामा नियन्त्रण कायम गरेको हमास बिद्रोही समूहले गरेका छन्। ११ दिने हिंसाको क्रममा २५० जना भन्दा धेरैको मृत्यु भयो, त्यसमा अधिकांश गाजाका छन्।

इजरायल र प्यालेस्टाइनबिचको युद्ध अन्त्यको प्रयासमा इजिप्ट, कतार, अमेरिका र संयुक्त राष्ट्रसंघ लागि परेका छन्। संयुक्त राष्ट्रसंघ सुरक्षा परिषदले शनिबार वक्तव्य जारी गरेर मध्यस्थकर्ताको प्रशंसा गर्दै युद्धविरामको पूर्ण पालना गर्न अपील गरेको थियो।

इजिप्टका मध्यस्थकर्ताहरु गाजा, इजरायल र वेष्ट ब्यांकमा रहेर युद्धविरामका लागि प्रयास गरेका हुन्। उनीहरुले समस्याको दीर्घकालीन समाधानको खोजीका लागि अहिले प्रयास तीव्र पारिरहेका छन् अरु सहयोगीहरुसँगको सहकार्यमा।