१५ माघ,२०८२  काठमाडौं –  काठमाडौंको मुलपानी क्षेत्रमा प्रहरीले गोली चलाएर १० जनालाई पक्राउ गरेको छ। पक्राउ परेका व्यक्तिहरू लुटपाटमा संलग्न रहेको प्रहरीले जनाएको छ।

रातिको समयमा विभिन्न व्यक्तिहरूलाई पछ्याउँदै गहना, नगदलगायतका सामान लुटपाट गरिएको घटनापछि जिल्ला प्रहरी परिसर काठमाडौंको टोली गएराति परिचालित भएको थियो। सोही क्रममा लुटपाटमा संलग्न १० जनालाई नियन्त्रणमा लिइएको जिल्ला प्रहरी परिसर काठमाडौंका एसएसपी रमेश थापाले जानकारी दिए।

एसएसपी थापाका अनुसार पक्राउका क्रममा स्थिति नियन्त्रणमा लिन प्रहरीले गोलीसमेत चलाउनु परेको थियो। घटनाबारे थप अनुसन्धान भइरहेको प्रहरीले जनाएको छ।