१९ बैशाख २०८३ काठमाडौं- सरकारले शनिबार काठमाडौँका बल्खु, बंशीघाट र शंखमूल क्षेत्रमा रहेका कुल ७४४ घर–टहरा हटाएको छ। सरकारका प्रवक्ता सस्मित पोखरेलको सचिवालयका अनुसार बल्खु क्षेत्रमा मात्रै ४०१ वटा घर, टहरा र छाप्रो हटाइएको छ। त्यस्तै बंशीघाटमा १९३ वटा संरचना भत्काइएको छ भने शंखमूल क्षेत्रमा १५० वटा पक्की घर हटाइएको जनाइएको छ।

यस क्रममा ३२३ परिवार सम्पर्कमा आएका छन्, जसका कुल १ हजार ४१४ सदस्य प्रभावित भएका छन्। प्रभावितमध्ये ८० जनालाई तत्कालका लागि खरिपाटीमा स्थानान्तरण गरी व्यवस्थापन गरिएको सचिवालयले जनाएको छ।

सरकारले नदी किनार तथा जोखिमयुक्त क्षेत्रमा रहेका अवैध संरचना हटाउने अभियानलाई निरन्तरता दिने बताएको छ भने प्रभावितहरूको व्यवस्थापनका लागि थप पहल भइरहेको जनाएको छ।