१८ चैत,२०८२ काठमाडौं – नेपाल राष्ट्र बैंकले आज २५ अर्ब रुपैयाँको निक्षेप संकलन गर्ने भएको छ। केन्द्रीय बैंकले ३९ दिनको लागि निक्षेप संकलन उपकरणको बोलकबोल तथा निष्काशन गर्ने जनाएको छ।

यसका लागि आज दिउँसो ३ बजे बोलकबोल हुने राष्ट्र बैंकले जानकारी दिएको छ। निक्षेप दिन चाहने ‘क’, ‘ख’ र ‘ग’ वर्गका बैंक तथा वित्तीय संस्थाहरूले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन्। बोलकबोल ब्याजदरमा हुने र बहुब्याजदरमा पनि बहुबोलकबोल गर्न सकिने व्यवस्था गरिएको छ।

यो ३९ दिने निक्षेप संकलन उपकरणको साँवा तथा ब्याज वैशाख २७ गते भुक्तानी गरिने राष्ट्र बैंकले जनाएको छ।