५ फाल्गुन, २०८२ काठमाडौं – जल तथा मौसम विज्ञान विभागले हाल देशभर पश्चिमी वायुको सामान्य प्रभाव रहेको जनाएको छ। विभागका अनुसार अहिले कोशी, गण्डकी र कर्णाली प्रदेशका उच्च पहाडी तथा हिमाली भू–भागमा आंशिक बदली रहेको छ भने अन्य स्थानमा मौसम मुख्यतया सफा रहेको छ।

आज दिउँसो तराईका केही स्थानमा मध्यान्हसम्म हुस्सु/कुहिरो लाग्ने सम्भावना छ। उच्च पहाडी र हिमाली क्षेत्रमा आंशिक बदली रहनेछ। कोशी, गण्डकी र कर्णाली प्रदेशका उच्च भू–भागका एक–दुई स्थानमा हल्का वर्षा वा हिमपात हुन सक्ने पूर्वानुमान गरिएको छ।

आज राति पनि तराईका थोरै स्थानमा तुँवालो रहनेछ। कर्णाली, सुदूरपश्चिम तथा गण्डकी प्रदेशका पहाडी र हिमाली क्षेत्रमा आंशिक बदली रहनेछ भने अन्य भू–भागमा मौसम सफा रहने विभागले जनाएको छ। गण्डकी प्रदेशका उच्च भू–भागका एक–दुई स्थानमा हल्का वर्षा/हिमपातको सम्भावना रहेको छ।