४ पुस,२०८२ काठमाडौं— नेकपा एमालेका अध्यक्ष केपी शर्मा ओलीले पार्टीभित्र अनुशासन अनिवार्य रहेको बताएका छन्। ११औँ महाधिवेशनबाट निर्वाचित केन्द्रीय कमिटीको पहिलो बैठकलाई सम्बोधन गर्दै उनले महाधिवेशनको मतपरिणाम स्वीकार गरिसकिएको र पार्टी अब एकताबद्ध रूपमा अघि बढ्ने बताए।

अध्यक्ष ओलीले पार्टीको छविमा आँच पुर्‍याउने कुनै पनि गतिविधि सह्य नहुने स्पष्ट पारे। अनुशासन समाज र संगठन दुवैका लागि अपरिहार्य भएको उल्लेख गर्दै उनले अनुशासनबिनाको अवस्था स्वीकार्य नहुने बताए।

एमाले लोकतान्त्रिक पार्टी भएको दाबी गर्दै ओलीले बाहिरी रूपमा राष्ट्रवादको आवरण ओढेर अराजक गतिविधि गर्ने प्रवृत्तिसँग एमालेको कुनै सम्बन्ध नरहेको स्पष्ट पारे। उनले पार्टीमा दृढ विश्वास, एकता र अनुशासन आवश्यक रहेकोमा जोड दिए।