मंसिर २६,२०८२ काठमाडौं— नयाँ बानेश्वर काठमाण्डौेंमा अवस्थित युनिग्लोव कलेजले मंसिर २५ र २६ गते “१४औँ युनिग्लोब अन्तर्राष्ट्रिय सम्मेलन” भव्यताको साथ सम्पन्न गरेको छ । २ दिनसम्म सञ्चालन भएको यस अन्तर्राष्ट्रिय सम्मेलनको उद्देश्य विद्यार्थीहरुको सैद्धान्तिक र व्यावहारिक ज्ञानका साथसाथै अनुसन्धान र अन्वेषणमूलक शिक्षा प्रदान गर्ने रहेको छ ।

यस कार्यक्रमको उद्घाटन प्रमुख अतिथि पोखरा विश्वविद्यालयका उपकुलपति प्रा.डा. वेदराज के.सी.ज्यूले गरेका छन् । साथै उनले “यो सम्मेलनमा सहभागीहरूका लागि व्यवसाय व्यवस्थापनको क्षेत्रमा रहेका अग्रणी विज्ञहरूबाट अनुभव बढाउने र सिक्ने एउटा ठूलो अवसर भएको कुरा बताए। उपकुलपति प्रा.डा. के.सी.ले यस्ता अन्तर्राष्ट्रिय सम्मेलनले विद्यार्थीहरुको शैक्षिक स्तर र अनुसन्धानमा निकै ठूलो योगदान पुग्ने हुनाले अन्य सबै शैक्षिक संस्थाहरुले पनि यस्ता कार्यक्रम गर्न आवश्यक रहेको बताए ।

यस कार्यक्रमका सभापति एवं सम्मेलन प्रमुख प्रा.डा. राधेश्याम प्रधानले अनुसन्धानमुलक शिक्षण पद्धतिमा जोड दिदै अर्थशास्त्र, वित्तशास्त्र, बजार व्यवस्थापन र संस्थागत सुशासनमा हुने नयाँ अनुसन्धान र अन्वेषणले शिक्षामा नयाँ आयाम थपिने कुरामा जोड दिए । यूनिग्लोव कलेजका प्राचार्य तथा अध्यक्ष डा. नर बहादुर विष्टले सबै उपस्थितलाई स्वागत गर्दै युनिग्लोव कलेजले शैक्षिक क्षेत्रमा अग्रणी भुमिका खेली शैक्षिक, आर्थिक र सामाजिक क्षेत्रमा परिवर्तनको लागि अनुसन्धानमुलक शिक्षण पद्धतिमा महत्वपूर्ण हुने बताए।

उक्त कार्यक्रममा पोखरा विश्वविद्यालयका रजिष्ट्रार प्रा.डा. अजय थापा, व्यवस्थापन संकायका डिन प्रा.डा. ज्ञानेश्वर शर्मा तथा स्वदेशी र विदेशी विश्वविद्यालयका प्राध्यापक तथा अनुसन्धानकर्ताहरुले सम्मेलनको महत्वको बारेमा बताए । यस कार्यक्रममा फ्रान्स, फिनल्याण्ड, बङ्गलादेश, भारत, मलेसिया, बेलायत, दक्षिण अफ्रिका, क्रोएसिया र संयुक्त राज्य अमेरिका लगायतका देशहरुबाट १८ जना प्रत्यक्ष र ९ जना भर्चुअल माध्यमबाट विदेशी प्राध्यापक तथा अनुसन्धानकर्ताहरु र युनिग्लोब कलेजका अनसन्धानकर्ताहरु लगायत नेपालभरबाट २४६ जना भन्दा बढी अनुसन्धानकर्ताहरुको सहभागिता रहेको थियो । उक्त सम्मेलनमा ८३ वटा अनुसन्धानमुलक कार्यपत्रहरु प्रस्तुत गरिएको थियो । यस सम्मेलनलाई नेपालमा आयोजना हुने अन्तर्राष्ट्रिय सम्मेलनहरु मध्ये सबैभन्दा ठूलो र बढी कार्यपत्र प्रस्तुत हुने सम्मेलनको रुपमा चित्रण गरिएको छ ।

यस सम्मेलनमा विदेशी पाहुनाहरुलाई नेपाली सांस्कृतिक पहिचान झल्किने कार्यक्रमको आयोजना गरिएको थियो । कार्यक्रमको अन्त्यमा युनिग्लोब कलेजका प्रबन्ध निर्देशक डा. गंगाधर दाहालले कार्यक्रममा उपस्थित हुने सबै प्रतिनिधि, अनुसन्धानकर्ता, सहयोगी सबैलाई धन्यवाद ज्ञापन गर्दै सम्मेलनको समापन गरेका थिए ।