माघ ३०, २०८१ काठमाडौँ: कैलालीको धनगढीमा प्रहरीमाथि चक्कु प्रहार गर्न खोज्ने युवा पक्राउ परेका छन् । पक्राउ पर्नेमा कैलालीको फूलबारीका टेकबहादुर टमटा छन् ।

प्रहरीले गए राति उनलाई धनगडीको चौराहाबाट नियन्त्रणमा लिन खोजेको थियो । तर, उनी प्रहरीलाई चक्कु देखाएर भाग्न खोजेका थिए ।

पछि प्रहरीले लाठी चार्ज गरेर नियन्त्रण गर्न खोज्दा प्रहरीलाई नै लखेटेर चक्कु प्रहार गर्न खोजेका थिए । राति नै प्रहरीको थप टोली खटिएर उनलाई नियन्त्रणमा लिएको जिल्ला प्रहरी कार्यालय कैलालीका प्रमुख एसपी पदम विष्टले जानकारी दिए ।

प्रहरीको प्रारम्भिक अनुसन्धानका क्रममा उनको मानसिक स्वास्थ्यमा समस्या रहेको खुलेको छ । प्रहरीले उनलाई मनोविद्‌लाई जाँच गराउने तयारी गरेको छ ।