काठमाडौं। सत्तरुढ दल नेकपाका अध्यक्ष पुष्पकमल दाहाल प्रचण्डले आन्तरिक गृहकार्य नपुगेकाले बिहीबारका लागि बोलाइएको पार्टीको स्थायी कमिटी बैठक स्थगित भएको बताएका छन् ।

उनले अर्का अध्यक्ष एवं प्रधानमन्त्री केपी शर्मा ओलीसँग छलफल सकिएपछि दुई दिनभित्र स्थायी कमिटीको बैठक बोलाउने पनि बताएका छन् । संसद भवनमा प्रतिक्रिया दिँदै उनले भने, आन्तरिक गृहकार्य नपुगेर बैठक बस्न सकेन । अलि गृहकार्य नपुगेकै हो । दुवै अध्यक्षले बैठक एक दुई दिनभित्र बोलाउँछौं ।

स्थायी कमिटी बैठकका एजेण्डा तय गर्न बुधबार प्रधानमन्त्री निवासमा बसेको पार्टीको सचिवलाय बैठकले एजेन्डा तय गर्न नसकेपछि स्थायी कमिटी बैठक अनिश्चित बनेको छ ।