२० चैत,२०८२ जनकपुरधाम — धनुषाको लालगढबाट एक जना सशस्त्र प्रहरी निरीक्षक घुससहित पक्राउ परेका छन्। पक्राउ पर्नेमा प्रहरी निरीक्षक ओकिल अधिकारी रहेका छन्।

अख्तियार दुरुपयोग अनुसन्धान आयोग क्षेत्रीय कार्यालय बर्दिबासको टोलीले उनलाई आज बिहान लालगढबाट ४० हजार रुपैयाँ घुससहित नियन्त्रणमा लिएको जनाएको छ।

अख्तियारका अनुसार कमला–ढल्केवर–बाग्मती सडक निर्माण खण्डअन्तर्गत माटो तथा ग्राभेल फिलिङ कार्यमा प्रयोग हुने सवारी साधनहरू रोकेर अनावश्यक अवरोध सिर्जना गर्ने र घुस माग्ने गरेको उजुरीका आधारमा उनीमाथि निगरानी गरिएको थियो। सोही क्रममा उनलाई घुस लिँदै गर्दा रंगेहात पक्राउ गरिएको स्रोतले जनाएको छ।

अख्तियारले अधिकारीमाथि थप अनुसन्धान भइरहेको जनाएको छ।