१६ असोज २०८३ काठमाडौं — नेकपाले सभामुख डीपी अर्यालले प्रधानमन्त्री बालेन्द्र शाहलाई गरेको रुलिङ पालना नभएको भन्दै प्रश्न उठाएको छ। शुक्रबार प्रतिनिधि सभाको बैठकमा बोल्दै नेकपाका संसदीय दलका उपनेता प्रमेश हमालले सभामुखले प्रधानमन्त्रीलाई रुलिङ गरे पनि त्यसको कार्यान्वयन हुन नसकेको भन्दै प्रश्न गरेका हुन्।

‘यहाँले प्रधानमन्त्रीलाई रुलिङ गराउनुभयो । खै त्यो रुलिङको पालना भएको ? तपाईंले पालना गराउनु पर्दैन ?’ उनले सभामुखलाई प्रश्न गरे।हमालले संसद्को रोष्ट्रममा उभिएर प्रधानमन्त्रीले सीमासम्बन्धी अभिव्यक्ति दिएको विषयमा समेत आपत्ति जनाए। प्रधानमन्त्रीले नेपालले पनि भारतका विभिन्न ठाउँमा भूभाग मिचेको अभिव्यक्ति दिएको भन्दै उनले उक्त भनाइ सच्याउनुपर्ने र संसद्को अभिलेखबाट हटाउनुपर्ने माग गरे।

‘उहाँले नेपालले पनि भारतको धेरै ठाउँमा भूभाग मिचेको छ भन्नुभएको छ, यो करेक्सन हुनुपर्दैन ? संसद्को रेकर्डबाट हट्नुपर्दैन ? यसलाई रेकर्डमै राखेर जाने हो ?’ उनले भने।

हमालले सरकारले संसद्को मूल्य, मान्यता र मर्यादा कायम गर्न नसकेको आरोपसमेत लगाए। सरकार निरङ्कुश ढङ्गले अघि बढिरहेको उनको दाबी थियो।