१६ असोज २०८३ काठमाडौं — महाकाली नदीमा आएको बाढीले क्षति पुर्‍याएको दोधारा चाँदनी र भीमदत्तनगर जोड्ने ऐतिहासिक झोलुङ्गे पुलको अवस्था निरीक्षण गर्न काठमाडौंंबाट प्राविधिक टोली सुदूरपश्चिम पुगेको छ। शहरी विकास मन्त्रालयअन्तर्गतको सस्पेन्सन ब्रिज डिभिजन, ललितपुरबाट उपमहानिर्देशक कमल अधिकारीको नेतृत्वमा टोली बिहीबार बेलुका कैलालीको धनगढी पुगेको हो। टोलीले शुक्रबार कञ्चनपुरको दोधारा चाँदनी पुगेर क्षतिग्रस्त पुलको स्थलगत निरीक्षण गर्नेछ।

उपमहानिर्देशक अधिकारीले पुलको अवस्था निरीक्षण गरी आवश्यक निर्णय लिइने बताए। उनका अनुसार उक्त पुल सस्पेन्सन ब्रिज डिभिजनले नै निर्माण गरेको हो। पुलमा क्षति पुगेकै दिन कञ्चनपुरका प्रमुख जिल्ला अधिकारी मदन कोइरालाले दोधारा चाँदनी पुगेर प्राविधिक अध्ययनको प्रक्रिया अघि बढाइएको बताएका थिए। अध्ययन प्रतिवेदन प्राप्त भएपछि पुल पुनर्निर्माणको प्रक्रिया अघि बढाइने उनको भनाइ थियो।

प्रमुख जिल्ला अधिकारी कोइरालाले पुल मर्मतका लागि आवश्यक समन्वय गरिदिन बिहीबार नै गृह मन्त्रालयलाई पत्राचार गरिएको जानकारी दिए। गत बुधबार महाकाली नदीमा आएको बाढीले झोलुङ्गे पुलको एक भाग चुँडिएर नदीमा लत्रिएको थियो। त्यसयता पुलबाट आवतजावत पूर्णरूपमा बन्द गरिएको छ।

प्रजिअ कोइरालाका अनुसार पुलको भाग चुँडिएर नदीमा झरेको स्थानमा पानीको बहावसमेत तीव्र रहेको छ। प्राविधिक टोलीको स्थलगत अध्ययनपछि पुलको मर्मत वा पुनर्निर्माणबारे आवश्यक प्रक्रिया अघि बढाइनेछ।