१६ असोज २०८३ काठमाडौं — काठमाडौं महानगरपालिकाले ज्येष्ठ नागरिकलाई निःशुल्क स्वास्थ्य उपचार सेवा उपलब्ध गराउने भएको छ। यसका लागि महानगरपालिकाले छत्रपाटी निःशुल्क चिकित्सालय र सामुदायिक स्वास्थ्य परिषद्सँग सम्झौता गरेको छ।

अन्तर्राष्ट्रिय ज्येष्ठ नागरिक दिवसको अवसरमा आयोजित कार्यक्रममा महानगरपालिकाका कार्यवाहक प्रमुख सुनिता डंगोल र प्रमुख प्रशासकीय अधिकृत मुक्तिराम अर्यालको रोहवरमा सम्झौतामा हस्ताक्षर गरिएको हो।

सम्झौतामा महानगरपालिकाका तर्फबाट सामाजिक विकास विभागका प्रमुख समीक्षा निरौलाले हस्ताक्षर गरेकी छन्। त्यस्तै, छत्रपाटी निःशुल्क चिकित्सालयका तर्फबाट अध्यक्ष डा. मनोजमान श्रेष्ठ र सामुदायिक स्वास्थ्य परिषद्का तर्फबाट उपाध्यक्ष प्रकाशकुमार श्रेष्ठले हस्ताक्षर गरेका छन्। सम्झौतापछि कार्यवाहक प्रमुख डंगोलले ज्येष्ठ नागरिकलाई सहज र सरल स्वास्थ्य सेवा उपलब्ध गराउनु कार्यक्रमको मुख्य उद्देश्य रहेको बताइन्।

उनले अस्पतालमा पहिलोपटक स्वास्थ्य जाँच गराउन आउने ज्येष्ठ नागरिकको संख्या कार्यक्रमको प्रभावकारिता मूल्याङ्कन गर्ने महत्वपूर्ण सूचक हुने बताइन्। अस्पताल आउन नसक्ने तथा घरबाट बाहिर निस्कन कठिनाइ हुने ज्येष्ठ नागरिकलाई समेत स्वास्थ्य सेवाको पहुँचमा ल्याउनुपर्नेमा उनले जोड दिइन्।

महानगरपालिकाले ज्येष्ठ नागरिकको स्वास्थ्य अवस्था सुधार गर्नुका साथै उनीहरूलाई समयमै स्वास्थ्य परीक्षण तथा उपचारको पहुँचमा पुर्‍याउने उद्देश्यले निःशुल्क उपचारको व्यवस्था गरेको जनाएको छ।

सम्झौतापछि सम्बन्धित स्वास्थ्य संस्थामार्फत ज्येष्ठ नागरिकले स्वास्थ्य परीक्षण तथा आवश्यक उपचार सेवा निःशुल्क प्राप्त गर्नेछन्।