८ भदौ २०८३ काठमाडौं – प्रतिनिधिसभाको बैठकमा प्रयोग भएका सत्तारुढ रास्वपाकी सांसद इन्दिरा राना मगर र नेकपा एमाले संसदीय दलका नेता रामबहादुर थापाका सातवटा शब्द संसद्को अभिलेखबाट हटाइएको छ।

सोमबारको बैठकमा सभामुख डोलप्रसाद अर्यालले राना मगरले भदौ १ गते प्रयोग गरेका ‘भालु’, ‘वेश्या’ र ‘साइबर सेना’ शब्द अभिलेखबाट हटाउन निर्देशन दिएका हुन्।

त्यस्तै, एमाले संसदीय दलका नेता थापाले भदौ ३ गते प्रयोग गरेका ‘नागरिकहरूको बली’, ‘पाकिस्तानी मोडल’, ‘नर्थ कोरिया मोडल’ र ‘अमेरिका’ शब्द पनि अमर्यादित तथा अनावश्यक भएको भन्दै अभिलेखबाट हटाउन सभामुखले सचिवालयलाई निर्देशन दिएका छन्।

सभामुख अर्यालले संसदीय मर्यादा कायम राख्न अमर्यादित तथा अनावश्यक शब्द प्रयोग नगर्न सांसदहरूलाई आग्रहसमेत गरेका छन्।