४ साउन २०८३ काठमाडौं- लगातारको वर्षापछि खसेको पहिरोका कारण मुग्लिन–काठमाडौं सडकखण्ड अवरुद्ध भएको छ।प्रहरीका अनुसार पृथ्वी राजमार्गअन्तर्गत धादिङको बेनीघाटस्थित जवाङ खोला नजिक र चितवनको इच्छाकामना गाउँपालिकाको फिस्लिङ क्षेत्रमा पहिरो खसेपछि सडक पूर्ण रूपमा अवरुद्ध भएको हो।

हाल दुवै स्थानमा पहिरो पन्छाएर सडक सञ्चालनमा ल्याउने प्रयास भइरहेको प्रहरीले जनाएको छ। यसअघि लगातारको वर्षाका कारण रातिको यात्रा जोखिमपूर्ण हुने भन्दै धादिङ र चितवन प्रशासनले राति १० बजेदेखि बिहान ५ बजेसम्म उक्त सडकखण्डमा सवारी साधन सञ्चालनमा रोक लगाएका थिए।

प्रशासनले वर्षा जारी रहेकाले अत्यावश्यक बाहेकको यात्रा नगर्न तथा सडकको पछिल्लो अवस्थाबारे जानकारी लिएर मात्र यात्रा गर्न सर्वसाधारणलाई आग्रह गरेको छ।