१० असार २०८३ काठमाडौं – नेपाल स्टक एक्सचेञ्ज (नेप्से) परिसूचक मंगलबार १४.४५ अंकले घटेर २६६०.०२ बिन्दुमा झरेको छ। आज ३३८ कम्पनीको १ करोड ७ लाख ७७ हजार कित्ता शेयर खरिद–बिक्री हुँदा कुल ४ अर्ब ४१ करोड ८६ लाख रुपैयाँ बराबरको कारोबार भएको नेप्सेले जनाएको छ।

कारोबार भएका १३ उपसमूहमध्ये ११ उपसमूहको परिसूचक घटेको छ। बैंकिङ, विकास बैंक, जलविद्युत्, जीवन बीमा, निर्जीवन बीमा, होटल तथा पर्यटनलगायत अधिकांश समूह राताम्य बनेका छन्।

यद्यपि, फाइनान्स र व्यापार समूहका लगानीकर्ताले भने केही राहत पाएका छन्। यी दुई उपसमूहको परिसूचकमा सामान्य सुधार देखिएको छ।

समग्र बजारमा बिक्रीचाप बढ्दा नेप्से दोहोरो अंकले घटेको हो। कारोबार रकम भने ४ अर्ब रुपैयाँभन्दा माथि कायम रहँदा लगानीकर्ताको सक्रियता भने निरन्तर देखिएको छ।