मंसिर ८, २०८२ काठमाडौं – प्रधानमन्त्री सुशीला कार्कीको सचिवालयले प्रमुख स्वकीय सचिव आदर्श कुमार श्रेष्ठले नातेदारलाई नियुक्त गरेको आरोप असत्य र अनावश्यक भन्दै खण्डन गरेको छ। सचिवालयका अनुसार थर वा जातीय पृष्ठभूमि मिलेकै आधारमा नातेदारीको जबरजस्ती प्रचार गरिएको छ।

प्रेस संयोजक रामबहादुर रावलले जारी गरेको विज्ञप्तिमा सुरक्षाको कारण विश्वासिलो र चौबीसै घण्टा साथमा काम गर्न सक्ने व्यक्तिको कानुनी आधारमै नियुक्ति गरिएको र त्यसलाई गलत तरिकाले व्याख्या नगर्न आग्रह गरिएको छ।

विज्ञप्तिमा कार्कीले पारदर्शिता, मितव्ययिता र जवाफदेहितामा प्रतिबद्धता देखाउँदै अत्यन्तै न्यून जनशक्तिबाट सचिवालय सञ्चालन गरेको उल्लेख छ। ६७ जनाको दरबन्दी रहे पनि कार्कीले मात्र २० जनाको सचिवालय बनाएर काम गरिरहेको सचिवालयले जनाएको छ।