१ असोज २०८३ काठमाडौं — प्रधानमन्त्री राहत कोषमा १ हजार रुपैयाँ सहयोग गरेका एक ग्राहकले करदाता प्रोत्साहन कार्यक्रमअन्तर्गत १ लाख रुपैयाँ उपहार प्राप्त गरेका छन्। आन्तरिक राजस्व विभागले आज करदाता प्रोत्साहन कार्यक्रमअन्तर्गत भदौ महिनाका विजेताको घोषणा गर्ने क्रममा राहत कोषमा १ हजार रुपैयाँ सहयोग गरेका ग्राहकलाई १ लाख रुपैयाँ उपहार परेको जनाएको हो।

उक्त विजेताको कुपन नम्बर ०४२६१८४७७६२० रहेको विभागले जनाएको छ। सरकारले सामान्यतया हरेक १५/१५ दिनमा करदाता प्रोत्साहन कार्यक्रमका विजेता घोषणा गर्दै आएको छ। तर, भदौ १० गते आएको विनाशकारी बाढीका कारण भदौ १६ गतेका लागि तय गरिएको कार्यक्रम स्थगित भएपछि यसपटक भदौ महिनाको विजेता एकमुष्ट रूपमा घोषणा गरिएको हो।