कात्तिक १३, २०८२ काठमाडौं— बीपी राजमार्गको पुनर्निर्माण तथा मर्मत–सम्भारका लागि नेपाल सरकार र जापान सरकारबीच अनुदान सम्झौतामा हस्ताक्षर भएको छ। जापान सरकारले राजमार्ग मर्मत तथा पुनर्निर्माणका लागि २ अर्ब ८० करोड जापानी येन (करीब २ अर्ब ६० करोड नेपाली रुपैयाँ) बराबरको अनुदान सहायता उपलब्ध गराउने भएको हो।

सम्झौता अर्थमन्त्री रामेश्वर खनाल र गृहमन्त्री ओम प्रकाश अर्यालको उपस्थितिमा अर्थ मन्त्रालयमा सम्पन्न भएको हो। सम्झौतामा नेपाल सरकारका तर्फबाट अर्थसचिव घनश्याम उपाध्याय र जापानका तर्फबाट नेपालका लागि राजदूत तोरु माएदाले हस्ताक्षर गरेका छन्।

बीपी राजमार्ग महोत्तरीको बर्दिबासदेखि काभ्रेपलान्चोकको धुलिखेलसम्म फैलिएको छ, जसको कुल लम्बाइ १५९ किलोमिटर रहेको छ। यो राजमार्ग पनि जापान सरकारकै अनुदान सहयोगमा निर्माण गरिएको थियो।

गत वर्षको विनाशकारी बाढी र पहिरोका कारण राजमार्गका विभिन्न खण्डमा ठूलो क्षति पुगेको थियो, जसमा विशेष गरी रोशी खोला आसपासको भाग पूर्ण रूपमा नष्ट भएको थियो। जापानको यो सहयोगले ती क्षतिग्रस्त खण्डहरू पुनःस्थापना गर्न महत्वपूर्ण भूमिका खेल्ने अपेक्षा गरिएको छ।

सम्झौता समारोहमा बोल्दै अर्थमन्त्री खनालले जापानको अनुदान सहायता नेपाल–जापानबीचको मित्रता र सहकार्यको प्रतीक भएको बताए। जापानी राजदूत माएदाले यस सहयोगले बीपी राजमार्ग पुनर्निर्माणका साथै यातायात सञ्जाल सुदृढ बनाउन योगदान पुर्‍याउने विश्वास व्यक्त गरे।