१८ असोज २०८३ पोखरा — चालू आर्थिक वर्ष २०८३/८४ को साढे दुई महिना बितिसक्दा पनि सरकारको पुँजीगत खर्च निकै कमजोर देखिएको छ। असोज तेस्रो सातासम्म सरकारले पुँजीगततर्फ १२ अर्ब २५ करोड १० लाख रुपैयाँ मात्रै खर्च गरेको छ।

यो रकम सरकारले चालू आर्थिक वर्षका लागि विनियोजन गरेको कुल पुँजीगत बजेटको २.८४ प्रतिशत मात्रै हो। सरकारले यस वर्ष पुँजीगत खर्चका लागि ४ खर्ब ३१ अर्ब १० करोड ६३ लाख रुपैयाँ विनियोजन गरेको छ। आर्थिक वर्षको सुरुवाती चरणमा आयोजना तयारी, ठेक्का प्रक्रिया, जग्गा अधिग्रहण तथा मोबिलाइजेसनलगायतका कारण पुँजीगत खर्च कम हुने गर्छ। तर, यसपटकको खर्च प्रगति कमजोर देखिँदा विकास आयोजना कार्यान्वयनमा चुनौती देखिएको छ।

यस अवधिमा सरकारको चालू खर्च भने पुँजीगत खर्चको तुलनामा निकै उच्च छ। असोज तेस्रो सातासम्म चालूतर्फ २ खर्ब ५ अर्ब ३८ करोड ६८ लाख रुपैयाँ खर्च भएको छ। यो वार्षिक लक्ष्यको १६.१६ प्रतिशत हो।

त्यस्तै, वित्तीय व्यवस्थातर्फ ७४ अर्ब ८५ करोड १९ लाख रुपैयाँ खर्च भएको छ। चालू, पुँजीगत र वित्तीय व्यवस्थातर्फ गरी सरकारको कुल खर्च २ खर्ब ९२ अर्ब ४८ करोड ९७ लाख रुपैयाँ पुगेको छ। यो वार्षिक बजेटको १३.७७ प्रतिशत हो। सरकारले चालू आर्थिक वर्षका लागि २१ खर्ब २४ अर्ब ३४ करोड ४४ लाख रुपैयाँको बजेट ल्याएको थियो। खर्चको तुलनामा राजस्व संकलनको प्रगति भने केही बलियो देखिएको छ। असोज तेस्रो सातासम्म सरकारले २ खर्ब २५ अर्ब ५२ करोड १४ लाख रुपैयाँ राजस्व संकलन गरेको छ। यो वार्षिक लक्ष्यको १४.२७ प्रतिशत हो।

संकलित राजस्वमध्ये कर राजस्व २ खर्ब १३ अर्ब ६ करोड ३७ लाख रुपैयाँ र गैरकर राजस्व १२ अर्ब ४५ करोड ७७ लाख रुपैयाँ रहेको छ।अनुदान तथा अन्य प्राप्तिसमेत जोड्दा सरकारको कुल प्राप्ति २ खर्ब ३३ अर्ब ३३ करोड ६४ लाख रुपैयाँ पुगेको छ।