१८ असोज २०८३ पोखरा — नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले देश, लोकतन्त्र र संविधान अप्ठेरो अवस्थामा रहेको भन्दै चिन्ता व्यक्त गरेका छन्। नेपाली कांग्रेसको १५औँ महाधिवेशनको उद्घाटन सत्रलाई सम्बोधन गर्दै प्रचण्डले सरकारका कतिपय अभिव्यक्ति, क्रियाकलाप र गतिविधिले देश स्वेच्छाचारितातर्फ जाने खतरा देखिएको बताए।

‘देश अप्ठेरोमा छ । लोकतन्त्र नै अप्ठेरोमा छ । संविधान पनि अप्ठेरोमा छ । अहिलेका सरकारका कयौँ अभिव्यक्ति, क्रियाकलाप र गतिविधिले स्वेच्छाचारितातिर देश जाने हो कि भन्ने गम्भीर खतरा पैदा भएको छ,’ उनले भने।

प्रचण्डले संघीय लोकतान्त्रिक गणतन्त्रलाई अझ सुदृढ बनाउन सबै मिलेर अघि बढ्नुपर्नेमा जोड दिए।

उनले अहिलेको समावेशी लोकतन्त्रसहितको संघीय लोकतान्त्रिक गणतन्त्र शान्ति सम्झौताको पनि एउटा अंग भएको बताए। संविधान र राजनीतिक परिवर्तनसँग जोडिएका केही विषय अझै टुंग्याउन बाँकी रहेको भन्दै उनले ती विषय समाधान नगरिए देश थप अप्ठेरो अवस्थामा जान सक्ने चेतावनी दिए।

‘हामीले अहिले जो समावेशी लोकतन्त्रसहितको संघीय लोकतान्त्रिक गणतन्त्र छ, त्यो शान्ति सम्झौताको अंगको रूपमा पनि छ,’ उनले भने, ‘अझै केही चिज टुंग्याउन बाँकी छ । त्यो टुंग्याइएन भने देश अझै अप्ठेरो अवस्थामा जान सक्छ।’