असोज ११, २०८२ काठमाडौं– शिक्षा, विज्ञान तथा प्रविधिमन्त्री महावीर पुनले दशैं–तिहारको समयमा पनि शिक्षकहरूको तलब निकासा नहुँदा गुनासो बढेपछि तलब तुरुन्त निकासा गर्न कडा निर्देशन दिएका छन्। मन्त्री पुनले भनेका छन्, “मन्त्रालयबाट तलब हरेक पालिकामा पहिले नै पठाइसकेको छ। यदि कुनै पालिकाले दशैं–तिहारको अवसरमा शिक्षकहरूको तलब ननिकालेमा नियमानुसार कारबाही गरिनेछ।”

उनले विद्यालय व्यवस्थापन समिति र प्रधानाध्यापकले पनि शिक्षकहरूको तलब ननिकालेको विषयमा गुनासो आएको बताउँदै, “भोलिसम्ममा नाजायज तरिकाले तलब नपाएको शिक्षकको तलब ननिकालेमा प्रधानाध्यापकलाई पनि कारबाही गरिनेछ,” चेतावनी दिएका छन्। शिक्षकहरूले दशैं–तिहारको समयमा तलब नपाएको गुनासो गरेको पृष्ठभूमिमा मन्त्री पुनको यो निर्णयले तलब वितरणमा सुधार आउने अपेक्षा गरिएको छ।