भदौ  १६,२०८२ काठमाडौं – निजी विद्यालय सञ्चालकहरूले विद्यालय शिक्षा विधेयकका ‘अव्यावहारिक र अन्यायपूर्ण प्रावधान’ हटाउन माग गर्दै काठमाडौं उपत्यकामा स्कुल बससहितको र्‍याली गरेका छन्। प्याब्सन, नेसनल प्याब्सन, हिसान, ओपन र एनएमएका सञ्चालकहरूले संयुक्तरूपमा चक्रपथमा र्‍याली निकालेका हुन्।

उनले विधेयकबाट ‘पूर्ण छात्रवृत्ति’ शब्द हटाउने, विद्यालयमा उत्पादन नहुने सामग्री उपलब्ध गराउने प्रावधान खारेज गर्ने र कम्पनी ऐनअनुसार दर्ता भएका विद्यालयलाई ‘गैरनाफामूलक’ बनाउने प्रावधान हटाउनुपर्ने माग राखेका छन्।

नेसनल प्याब्सनका अध्यक्ष सुवास न्यौपानेले २७ किलोमिटर रिङरोडमा स्कुल बस उतारेको बताए। तर, काठमाडौं उपत्यका ट्राफिक कार्यालयका एसपी दीपक गिरीका अनुसार प्रदर्शनले सवारी आवागमनमा खासै असर नपरेको छ।