२१ जेठ २०८०, काठमाडौँ : ओम सृजनशील समाजको आयोजनामा ऐतिहासिक तथा पर्यटकीय नगरी भक्तपुरमा राष्ट्रिय खुल्ला पुरुष भलिबल प्रतियोगिता हुने भएको छ । प्रतियोगिताका संयोजक पेशल आचार्यका अनुसार सूर्यविनायक नगरपालिका–४ दधिकोट हर्षचोकमा भक्तपुर जिल्ला खेलकुद विकास समिति र सूर्यविनायक नगरपालिकाको समन्वयमा सो प्रतियोगिता आयोजना गर्न लागिएको हाे ।

राष्ट्रिय पुरुष भलिबल प्रतियोगिता यही जेठ २७ गतेदेखि सञ्चालन हुने बताइएकाे छ । प्रतियोगितामा विजयी टिमलाई पुरस्कारको पनि व्यवस्था गरिएको छ जसअनुसार पहिलो हुने टोलीलाई रु ५० हजार पुरस्कार प्रदान गरिने छ । त्यसैगरी, दोस्रो हुने टोलीलाई रु २५ हजार र तेस्रोलाई रु १५ हजार पुरस्कार प्रदान गरिने छ । देशभरका २० टोली सहभागी हुने उक्त प्रतियोगिता तीन दिनसम्म चल्ने बताइएको छ ।