नेपालगन्जमा कोरोना भाइरसको संक्रमण दर उच्च हुँदै गएको छ । एक साता यता कोरोनाको ग्राफ अप्रत्याशित रुपले बढेको छ ।

केही दिनयता त स्वाब परीक्षण गराएका झण्डै सतप्रतिशतमा कोरोना संक्रमण कोरोना देखिएको छ ।

नेपालगन्जका वडा नम्बर १०, १२ र १८ मा कोरोना अप्रत्याशित रुपले फैलिएको जिल्ला कोभिड-१९ संकट व्यवस्थापन केन्द्रका फोकल पर्सन तेज वलीले बताएका छन् ।

नेपालगन्जको वडा नम्बर १० भृकुटीनगर, वडा नम्बर १२ कोरियनपुर र वडा नम्बर १८ कारकाँदोमा कोरोना संक्रमणदर उच्च रहेका छन् ।

चिन्ह वा लक्षण देखिएर अस्पतालसम्म पुगेकाहरुमा यो अवस्था देखिँदा समुदायस्तरमा कोरोना भुसको आगो झै फैलिसकेको सहजै अनुमान गर्न सकिन्छ ।

पहिलो लहरको कोरोनाले नराम्ररी गाँजेको नेपालगन्जलाई दोस्रो लहरले अझ बढी घेरेको छ । नेपालगन्जका तीन वटा वडा अहिले कोरोनाको ‘हटस्पट’ नै बनेका छन् ।