१० असार २०८३ काठमाडौं – नेपाली कांग्रेसले १५औँ महाधिवेशनको तयारीअन्तर्गत नयाँ क्रियाशील सदस्यता वितरणका लागि देशभरका ७७ जिल्लामा केन्द्रीय प्रतिनिधि खटाएको छ। सदस्यता व्यवस्थापन केन्द्रीय समितिको निर्णयअनुसार खटाइएका प्रतिनिधिहरूले जिल्लामा सदस्यता वितरण कार्यलाई प्रभावकारी, व्यवस्थित र पारदर्शी बनाउने जिम्मेवारी पाएका छन्।

कांग्रेसले नयाँ क्रियाशील सदस्यता वितरण प्रक्रियामा विशेष प्राथमिकता दिँदै ३५ वर्षमुनिका युवाको अधिकतम सहभागिता सुनिश्चित गर्ने लक्ष्य राखेको जनाएको छ। सोही उद्देश्यअनुसार जिल्लास्तरमा समन्वय, सहजीकरण र अनुगमनका लागि केन्द्रबाट प्रतिनिधि तोकिएको पार्टीले जनाएको छ।

खटाइएका केन्द्रीय प्रतिनिधिहरूलाई निर्धारित समयभित्र सम्बन्धित जिल्लामा पुगेर सदस्यता वितरणसम्बन्धी कार्यलाई गति दिन निर्देशन दिइएको छ।

कांग्रेसले क्रियाशील सदस्यता वितरणलाई आगामी महाधिवेशनको आधारभूत प्रक्रिया मानेको छ। सदस्यता वितरण अभियानमार्फत पार्टी संगठनलाई थप सुदृढ र युवा सहभागितामुखी बनाउने लक्ष्य रहेको जनाइएको छ।