२८ साउन २०८३ भक्तपुर- सुदूरपश्चिम प्रदेशका मुख्यमन्त्री कमलबहादुर शाहले पदबाट राजीनामा दिएका छन्। बिहीबार साँझ प्रदेश प्रमुख नजिर मियाँसमक्ष मुख्यमन्त्री शाहले राजीनामा पत्र बुझाएका हुन्।

यसअघि बिहीबार बसेको प्रदेश सभा बैठकलाई सम्बोधन गर्दै शाहले राजीनामा दिने घोषणा गरेका थिए। गत ३१ असारमा बजेटप्रति असहमति जनाउँदै नेकपा एमालेले प्रदेश सरकारलाई दिएको समर्थन फिर्ता लिएपछि शाह नेतृत्वको सरकार अल्पमतमा परेको थियो। समर्थन फिर्ता लिएको ३०औँ दिनमा शाहले राजीनामा दिएका हुन्।

मुख्यमन्त्रीको राजीनामापछि अब प्रदेश प्रमुखले नयाँ सरकार गठनका लागि आह्वान गर्नेछन्। पछिल्लो समय नेकपा एमाले र नेपाली कम्युनिस्ट पार्टीबीच भएको सहमतिअनुसार सुदूरपश्चिममा नेकपाको नेतृत्वमा नयाँ सरकार गठन हुने तयारी छ। नेकपाबाट संसदीय दलका नेता खगराज भट्ट मुख्यमन्त्री बन्ने तयारीमा छन्।