७ माघ,२०८२ काठमाडौं – नेपाली कम्युनिस्ट पार्टीका सहसंयोजक तथा पूर्वप्रधानमन्त्री माधवकुमार नेपालसहित जोडिएको पतञ्जलि भ्रष्टाचार प्रकरणको मुद्दाको पेसी माघ १४ गतेका लागि तोकिएको छ।

विशेष अदालतले अख्तियार दुरुपयोग अनुसन्धान आयोगलाई अनुसन्धान फाइल झिकाउन पुनः आदेश दिएपछि फाइल प्राप्त भएको र त्यसपछि पेसी तोकिएको अदालतले जनाएको छ।

अख्तियारले गत जेठ २२ गते पतञ्जलि योगपीठ तथा आयुर्वेद कम्पनी नेपालको जग्गा हिनामिना प्रकरणमा नेपालसहित ९३ जनाविरुद्ध मुद्दा दायर गरेको थियो। यस प्रकरणमा अख्तियारले १८ करोड ५८ लाख ५० हजार रुपैयाँ बिगो मागदाबी गरेको छ।

अख्तियारका अनुसार नेपाल प्रधानमन्त्री हुँदा २०६६ फागुन ६ गतेको मन्त्रिपरिषद् निर्णयबाट पतञ्जलिलाई हदबन्दीभन्दा बढी जग्गा व्यक्तिलाई लाभ हुने गरी हस्तान्तरण गरिएको थियो।