काठमाडौं — अमेरिकाले एकैदिन ९१ जना नेपाली नागरिकलाई डिपोर्ट गरी चार्टर विमानमार्फत काठमाडौं ल्याएको छ। उनीहरू सोमबार (माघ ५) त्रिभुवन अन्तर्राष्ट्रिय विमानस्थलमा आइपुगेका हुन्।

त्रिभुवन अन्तर्राष्ट्रिय विमानस्थलस्थित अध्यागमन कार्यालयका वरिष्ठ अध्यागमन अधिकृत अनुज भण्डारीका अनुसार, डोनाल्ड ट्रम्प दोस्रोपटक राष्ट्रपति भएपछि एकैदिन यति ठूलो संख्यामा नेपाली डिपोर्ट भएको यो पहिलो घटना हो। यसअघि पुस ३ गते ७५ जना तथा विभिन्न मितिमा ३७–३७ जना नेपालीलाई पनि अमेरिकाले चार्टर विमानमार्फत नेपाल पठाएको थियो।

अवैध रूपमा अमेरिका प्रवेश गरेको, भिसाविना बसेको वा कानुनी आधार नपुर्‍याएको आरोपमा नेपालीहरूलाई डिपोर्ट गरिएको हो।