१२ असोज २०८३ काठमाडौं — स्वास्थ्य तथा खाद्य स्वच्छता मन्त्री निशा मेहताले प्रतिनिधिसभाको सोमबारको बैठकमा स्वास्थ्य क्षेत्रसँग सम्बन्धित चारवटा विधेयक प्रस्तुत गरेकी छन्। मन्त्री मेहताले ‘रामराजाप्रसाद सिंह स्वास्थ्य विज्ञान प्रतिष्ठान विधेयक २०८३’, ‘स्वास्थ्यकर्मी तथा स्वास्थ्य संस्थाको सुरक्षासम्बन्धी (दोस्रो संशोधन) विधेयक २०८३’, ‘सुरक्षित मातृत्व तथा प्रजनन स्वास्थ्य अधिकार (पहिलो संशोधन) विधेयक २०८३’ र ‘आमाको दूधलाई प्रतिस्थापन गर्ने वस्तु बिक्री वितरण नियन्त्रण (पहिलो संशोधन) विधेयक २०८३’ प्रस्तुत गरेकी हुन्।

रामराजाप्रसाद सिंह स्वास्थ्य विज्ञान प्रतिष्ठान विधेयक प्रस्तुत गर्दै मन्त्री मेहताले मधेस प्रदेशमा स्वास्थ्य सेवाको पहुँच विस्तार र प्रादेशिक सन्तुलन कायम गर्न प्रतिष्ठान आवश्यक रहेको बताइन्। प्रदेशस्तरमा स्वास्थ्य विज्ञान प्रतिष्ठान स्थापना नहुँदा स्वास्थ्य सेवामा असन्तुलन देखिएको उनको भनाइ छ।

उनका अनुसार विधेयकले प्रतिष्ठानको पूर्वाधार विकास, विकास समितिको म्याद तथा प्रतिष्ठान सञ्चालनको मार्गचित्रलाई स्पष्ट गर्नेछ। संविधानप्रदत्त स्वास्थ्यसम्बन्धी अधिकार सुनिश्चित गर्न विधेयक कार्यान्वयन आवश्यक रहेको उनले बताइन्।

यस्तै, स्वास्थ्यकर्मी तथा स्वास्थ्य संस्थाको सुरक्षासम्बन्धी संशोधन विधेयकमा स्वास्थ्यकर्मीमाथि हुने आक्रमणलाई अपराधका रूपमा परिभाषित गरी कैद र जरिवानाको व्यवस्था प्रस्ताव गरिएको छ। स्वास्थ्यकर्मीको सुरक्षा थप प्रभावकारी बनाउन कडा कानुनी व्यवस्था आवश्यक रहेको मन्त्री मेहताको भनाइ छ।

सुरक्षित मातृत्व तथा प्रजनन स्वास्थ्य अधिकारसम्बन्धी संशोधन विधेयकमा सुत्केरी महिलालाई ६ महिनाको तलबसहितको बिदा र पुरुष कर्मचारीलाई ४२ दिनको प्रसूति स्याहार बिदा दिने प्रस्ताव गरिएको छ।

त्यस्तै, आमाको दूधलाई प्रतिस्थापन गर्ने वस्तुको बिक्री वितरण नियन्त्रणसम्बन्धी विधेयकले बाल आहार तथा आमाको दूधको प्रतिस्थापन गर्ने वस्तुको नियमन गर्ने व्यवस्था प्रस्ताव गरेको छ। संघीय संरचनाअनुसार यसको नियमन तथा पहुँचलाई स्थानीय तहसम्म विस्तार गर्ने लक्ष्य राखिएको छ।

सरकारले यी विधेयकलाई चालु आर्थिक वर्षका प्राथमिकतामा राखेको जनाएको छ।