९ भदौ २०८३ काठमाडौं – संघीय संसद्, प्रतिनिधिसभाको आज (मंगलबार) दिउँसो १ बजेका लागि तय गरिएको बैठक स्थगित भएको छ। संघीय संसद् सचिवालयले जारी गरेको सूचनाअनुसार विशेष कारणले आजको बैठक निर्धारित समयमै बस्न नसक्ने भएपछि बैठक भोलि बुधबारका लागि सारिएको हो।

प्रतिनिधिसभा नियमावली, २०८३ को नियम ६ को उपनियम (३) बमोजिम सभामुख डोलप्रसाद अर्यालले बैठक भदौ १० गते बुधबार दिउँसो १ बजे बस्ने गरी निर्धारण गरेको संघीय संसद्का महासचिव पद्मप्रसाद पाण्डेयद्वारा जारी सूचनामा उल्लेख छ। संसद् सचिवालयले विशेष कारणले आजको बैठक बस्न नसक्ने भएकाले भोलिका लागि बैठकको नयाँ मिति र समय निर्धारण गरिएको जनाएको छ।

यससँगै आज प्रतिनिधिसभामा हुने भनिएका कार्यसूचीसमेत भोलिको बैठकमा सर्ने भएका छन्।