१८ साउन २०८३ काठमाडौं – नेपाल आयल निगमले देशभर, विशेषगरी काठमाडौं उपत्यकामा खाना पकाउने एलपी ग्यासको अभाव नरहेको दाबी गरिरहेको छ। तर, राजधानीमा भने ग्यास नपाएर उपभोक्ताले सास्ती खेपिरहेका छन्। टेकुस्थित नेसनल ट्रेडिङ शाखामा सोमबार बिहानदेखि विभिन्न कम्पनीका खाली ग्यास सिलिन्डर बोकेर ठूलो संख्यामा उपभोक्ता लाममा बसेका देखिएका छन्।

सीमित समयको बिक्री, डिलरमा ग्यास नपाइने समस्या र वितरण प्रणालीको कमजोरीका कारण सर्वसाधारण घण्टौँ लाइन बस्न बाध्य भएका छन्।

निगमले पर्याप्त ग्यास आपूर्ति भइरहेको र केही स्थानमा कृत्रिम अभाव सिर्जना भएकाले समस्या देखिएको जनाएको छ। तर उपभोक्ताले निगमको दाबी र बजारको वास्तविकता फरक रहेको भन्दै प्रभावकारी बजार अनुगमन, सहज वितरण व्यवस्था तथा बिक्री समय बढाउन माग गरेका छन्।