२६ असार २०८३ काठमाडौं – सर्लाहीको गोडैता नगरपालिकामा आत्मदाह प्रयास गरेर गम्भीर घाइते भएका २५ वर्षीय विवेक मण्डललाई थप उपचारका लागि नेपाली सेनाको हेलिकप्टरमार्फत काठमाडौं पठाइएको छ।

जिल्ला प्रहरी कार्यालयका अनुसार गोडैता नगरपालिका निवासी मण्डलले आफ्नै शरीरमा पेट्रोल खन्याएर आगो लगाएका थिए। उनको स्वास्थ्य अवस्था गम्भीर रहेकाले केहीबेरअघि हेलिकप्टरमार्फत काठमाडौं रिफर गरिएको प्रहरीले जनाएको छ।

प्रारम्भिक अनुसन्धानअनुसार मण्डल घरबाट करिब २०० मिटर टाढा पुगेपछि आफ्नै शरीरमा आगो लगाएका थिए। प्रहरीका अनुसार घरपरिवारसँग भएको विवादपछि उनले आत्मदाहको प्रयास गरेको प्रारम्भिक अनुसन्धानबाट खुलेको छ।

घटनाबारे थप अनुसन्धान भइरहेको प्रहरीले जनाएको छ।