फिफा विश्वकप २०२६ अन्तर्गत अन्तिम ३२ को नकआउट चरणमा प्रजातान्त्रिक गणतन्त्र कङ्गोले बलियो दाबेदार इंग्ल्याण्डविरुद्ध उत्कृष्ट सुरुआत गरेको छ।

अमेरिकाको एटलान्टा स्टेडियममा जारी खेलको सातौँ मिनेटमा ब्रायन सिपेन्गाले काउन्टर अट्याकमार्फत आकर्षक गोल गर्दै कङ्गोलाई १–० को अग्रता दिलाएका हुन्।

खेलको सुरुआतदेखि इंग्ल्याण्डले बल नियन्त्रणमा राख्दै दबाब सिर्जना गर्ने प्रयास गरे पनि कङ्गोले तीव्र प्रतिआक्रमणको रणनीति अपनाउँदै पहिलो अवसरलाई गोलमा परिणत गरेको हो। सिपेन्गाको गोलसँगै विश्व फुटबलका समर्थकमाझ खेलले अप्रत्याशित मोड लिएको छ।

हाल इंग्ल्याण्ड बराबरी गोलका लागि लगातार आक्रामक खेल प्रदर्शन गरिरहेको छ भने कङ्गो अग्रता जोगाउने प्रयासमा छ।

यस खेलको विजेताले अन्तिम १६ मा आयोजक मेक्सिकोसँग प्रतिस्पर्धा गर्नेछ।