७ माघ,२०८२ काठमाडौं – अमेरिकी राष्ट्रपति डोनाल्ड ट्रम्प सवार विमान प्राविधिक गडबडीका कारण उडान भरेको केही समयमै हवाई अड्डामा फर्कन बाध्य भएको छ। ट्रम्प विश्व आर्थिक मञ्च (वर्ल्ड इकोनोमिक फोरम) मा सहभागी हुन स्विट्जरल्याण्डको डाभोस जाने क्रममा विमानमा प्राविधिक समस्या देखिएको बताइएको छ। ह्वाइट हाउसका अनुसार स्विट्जरल्याण्डका लागि उडान भरेको एअर फोर्स वन केही समयपछि वाशिंगटनस्थित हवाई अड्डामा फर्किएको हो।

ह्वाइट हाउसले विमानमा देखिएको सानो विद्युतीय समस्याका कारण सुरक्षालाई ध्यानमा राख्दै विमान फर्काइएको पुष्टि गरेको छ। घटनामा कुनै पनि किसिमको जोखिम नरहेको र सबै यात्रु सुरक्षित रहेको जनाइएको छ।

राष्ट्रपति ट्रम्प र उनको टोली अब अर्को विमानमार्फत डाभोस प्रस्थान गर्ने र विश्व आर्थिक मञ्चको कार्यक्रममा सहभागी हुने योजना यथावत् रहेको ह्वाइट हाउसले जनाएको छ।