३० पुस,२०८२ काठमाडौं – थाइल्याण्डको उत्तर-पूर्वी क्षेत्रमा निर्माणाधीन क्रेन खस्दा यात्रुवाहक रेल दुर्घटनाग्रस्त भएको छ। प्रारम्भिक रिपोर्ट अनुसार कम्तीमा २२ जनाको मृत्यु भएको छ भने ५५ जना घाइते भएका छन्।

दुर्घटना बुधबार बिहान बैंककबाट २३० किलोमिटर उत्तर-पूर्वमा पर्ने नाखोन रत्चासिमा प्रान्तको सिखियो जिल्लामा भएको हो। दुर्घटनाग्रस्त रेल बैंककबाट उबोन रत्चाथानी प्रान्ततर्फ जाँदै थियो।

स्थानीय रिपोर्टका अनुसार उच्च गतिको रेल मार्ग निर्माण भइरहेको स्थानमुनि गुडिरहेको रेलमा माथि काम गरिरहेको क्रेन खस्दा ठक्कर लागेको थियो। ठक्करपछि रेल लिकबाट बाहिरिएको थियो र केही बेर आगलागी समेत भएको थियो।

स्थानीय प्रहरीले उद्धार कार्य जारी राखेको र आगो नियन्त्रणमा आएको जानकारी दिएको छ। मृतक संख्या अझ बढ्न सक्ने अनुमान गरिएको छ।