कात्तिक १०, २०८२ काठमाडौं— राष्ट्रपति रामचन्द्र पौडेलले आज छठ पर्वको मुख्य दिन छठी माताको पूजा–आराधना गर्दै अस्ताउँदो सूर्यलाई अर्घदान गरेका छन्। राष्ट्रपति पौडेलसहित प्रथम महिला सविता पौडेलले काठमाडौंको गुहेश्वरी मन्दिरअगाडि बागमती किनारमा निर्माण गरिएको छठघाट पुगेर पूजा–अर्चना गरेका हुन्।

छठ पर्वका अवसरमा राजधानीका विभिन्न स्थानहरू—कमलपोखरी, गुहेश्वरी, गौरीघाटलगायत स्थानमा छठी माताको आराधना तथा सूर्य पूजा भव्य रूपमा सम्पन्न भइरहेको छ। श्रद्धालुहरूले अस्ताउँदो सूर्यलाई अर्घ दिँदै आजको दिन मनाइरहेका छन्।

चार दिनसम्म विधिपूर्वक मनाइने छठ पर्वको तेस्रो दिन आज मुख्य दिनका रूपमा मनाइँदैछ। भोलि बिहान उदाउँदो सूर्यलाई अर्घ दिएपछि छठ पर्व विधिवत रूपमा सम्पन्न हुनेछ।