असोज ४, २०८२ काठमाडौं– हाल मनसुनको न्यून चापीय रेखा देशको पश्चिमी भू-भागमा सरदर स्थानभन्दा दक्षिणमा तथा पूर्वी भागमा सरदर स्थानको आसपास अवस्थित रहेको मौसम पूर्वानुमान महाशाखाले जनाएको छ।

यस प्रणालीको प्रभावले गर्दा आज दिउँसो कोशी, मधेश, बागमती र गण्डकी प्रदेश लगायत देशका पहाडी भू-भागहरूमा साधारण बदली रहनेछ भने बाँकी तराई भू-भागमा आंशिक बदली रहने अनुमान गरिएको छ।

महाशाखाका अनुसार कोशी र बागमती प्रदेशका केही स्थानहरूमा, मधेश र गण्डकी प्रदेशका थोरै स्थानहरूमा तथा देशका बाँकी भागका एक-दुई स्थानमा मध्यम वर्षाको सम्भावना छ।

आज राति पनि मौसम मिल्दोजुल्दो रहनेछ। कोशी, मधेश, बागमती र गण्डकी प्रदेशमा साधारण बदली तथा अन्य भू-भागमा आंशिक बदली रहने देखिएको छ। यी चारै प्रदेशका थोरै स्थानहरूमा र पहाडी भू-भागका एक-दुई स्थानमा राति समेत मध्यम वर्षा हुन सक्ने अनुमान गरिएको छ।