भदौ ६,२०८२ काठमाडौं – विद्यालय शिक्षासम्बन्धी कानुनलाई संशोधन र एकीकरण गर्न बनेको विद्यालय शिक्षा विधेयक, २०८० को प्रतिवेदन प्रतिनिधिसभामा पेस गरिएको छ ।

शुक्रबार बसेको प्रतिनिधिसभाको बैठकमा शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले समितिले पारित गरेको विधेयक प्रतिवेदन पेस गरेका हुन् । समितिले बिहीबार विधेयक पारित गरेको थियो ।

प्रतिवेदन पेस गर्ने क्रममा सभापति थापाले विधेयक ऐतिहासिक महत्वको भएको दाबी गर्दै यसप्रति आपत्ति जनाउने सरोकारवाला निकायलाई आन्दोलनको बाटो नअपनाउन आग्रह गरे ।

उनले भने, “यो न पहिला थियो, न पछि आउने छ । यसले ऐतिहासिक बाटो अवलम्बन गरेको छ । त्यस कारण संसदबाटै आन्दोलन गर्छौँ भन्नेहरूलाई त्यो बाटोमा नलाग्न आह्वान गर्दछु ।”