१७ माघ २०७८, काठमाडौँ : उपत्यकाका मासु पसलमा अहिले खसीका खुट्टा किन्न सात दिनअघि नै बुकिङ गर्नु पर्ने भएको छ । माग अत्यधिक बढेपछि बजारमा खसीका खुट्टाको हाहाकार भएको मासु पसलेले बताए । नेपालमा कोरोना भाइरसको तेस्रो लहर चलिरहेको छ । काठमाडौँ उपत्यकामा ओमिक्रोन भेरियन्ट तिव्ररुपले बढीरहेको छ । खसीका खुट्टाको झोल खाए तागत (इम्युनिटी पावर) बढाउँछ भन्ने मानसिकताले खसीको खुट्टाको माघ तिव्ररुपमा बढ्न थालेको हो ।

मागअनुसार आपूर्ति हुन नसक्दा खसीका खुट्टा पाउन मासु पसलमा नाम टिपाउनुपर्ने अवस्था छ। नाम टिपाएपछि पनि एक हप्तापछि मात्रै खुट्टा लिने पालो आउँछ। खुट्टाको माग अहिले धेरै नै बढेको छ । मासु पसलमा एक हप्तादेखि खसीका खुट्टा खोज्नेहरूको लाइन रहेको र खुट्टाकै लागि ग्राहकबीच झगडै समेत पर्ने गरेको मासु पसले बताउछन् ।

यता संक्रमण रोग विशेषज्ञ डाक्टर अनुप सुवेदी खसीको खुट्टाको झोल खाँदा इम्युनिटी बढ्ने कुनै वैज्ञानिक प्रमाण नभएको बताए। इम्युनिटी भन्ने कुरा आज केही खाएर भोलि बढ्ने होइन । खसीको खुट्टाको झोल खाँदा इम्युनिटी बढ्छ भन्ने वैज्ञानिक प्रमाण छैन । कोरोना हुँदा झोलिलो कुरा खानुपर्छ । खसीको खुट्टाको झोल नै खानुपर्छ भन्ने छैन । खसीको अरू भागको मासु खानु र खुट्टाको झोल खानु उस्ताउस्तै हो । खुट्टाकै झोल खानुपर्छ भन्ने केही छैन, सुवेदीले भने ।