डोटी । कोरोना भाइरबाट बच्नका लागि भारतका विभिन्न शहरबाट घर फर्केका तीन सय ९४ जनालाई डोटीको क्वारेण्टाइनमा राखिएको छ ।

भारतबाट आएकाहरुलाई क्वारेण्टाइमा राख्न नेपाल सरकारले दिएको निर्देशनअनुसार डोटीका नौ वटै स्थानीय तहमा तीन सय ९४ लाई क्वारेण्टाइनमा राखिएको स्वास्थ्य कार्यालय डोटीका कोरोना सम्बन्धी सम्पर्क व्यक्ति सूर्य विष्टले जानकारी दिए ।

हालसम्म जिल्लाका विभिन्न स्थानीय तहका २४ स्थानमा क्वारेण्टाइन स्थापना गरिएको जानकारी दिए । विष्टका अनुसार हालसम्म स्थापना भएका क्वारेण्टाइनको कुल क्षमता पाँच सय १७ शय्या छ ।

सबैभन्दा बढी क्षमता बोगटान फुड्सिल गाउँपालिकाको क्वारेण्टाइनमा बनाइएको छ । गाउँपालिकाले पाँच स्थानमा स्थापना गरेको क्वारेण्टाइनमा एक सय १५ जना रहेका छन् ।

आदर्श गाउँपालिकामा ८१ जना क्वारेण्टाइनमा रहेका छन् । बडीकेदार गाउँपालिकामा ३६, जोरायल र पूर्वीचौकी गाउँपालिकामा दुईरदुई, केआईसिंह गाउँपालिकामा १३, सायल गाउँपालिकामा ३६, शिखर नगरपालिकामा ७६ र दीपायल सिलगढी नगरपालिकामा ३३ जना रहेका छन् ।

क्वारेण्टाइनमा बसेकाहरु सबै भारतका विभिन्न शहरबाट आएको विष्टले बताए । भारत तथा तेस्रो मुलुकबाट नेपाल आएर घरमै बसेकाहरुको सम्बन्धित स्थानीय तहले खोजी गरिरहेको समेत बिष्टले बताए । उनले भने ‘स्थानीय तहका जनप्रतिनिधि र स्वास्थ्यकर्मीले घरमै लुकेर बसेकाहरुलाई सम्झाउँदै क्वारेण्टाइनमा राख्ने काम गरिरहेका छन् ।’

क्वारेण्टाइनमा रहेका व्यक्तिहरुको खाना र खाजाको व्यवस्था सम्बन्धित स्थानीय तहहरुले नै गरिरहेको डोटीका प्रमुख जिल्ला अधिकारी टेकनारायण पौडेलले जानकारी दिए । गाँउमा बिदेशबाट आएका सबैलाई क्वारेण्टाइनमा राखिएको छ ।  उनिहरुमा कोरोनाको संक्रमण जोखिम रहेका हुदा क्वारेण्टाइनमा राखिएको बताएका छन् ।