कात्तिक ४, २०८२ काठमाडौं– चितवनको भरतपुर महानगरपालिका–१० स्थित एयरपोर्ट नजिकै सोमबार राति भएको स्कुटर दुर्घटनामा दुई जनाको मृत्यु भएको छ। राति करिब २ बजेतिर बा.प्र.०६–००३ प ०६९२ नम्बरको स्कुटर अनियन्त्रित भई सडकमा पल्टिँदा भरतपुर–२१ निवासी २५ वर्षीय सन्दीप घिमिरे र २८ वर्षीय कुशल अर्याल गम्भीर घाइते भएका थिए।

घाइते दुबै जनालाई तत्कालै उपचारका लागि भरतपुर अस्पताल लगिएको थियो। तर, उपचारकै क्रममा राति २:३५ बजे चिकित्सकहरूले दुबै जनालाई मृत घोषणा गरेका छन्।

दुर्घटनाको कारणबारे अनुसन्धान भइरहेको भए पनि स्कुटर तीव्र गतिमा रहेको र त्यसै कारण नियन्त्रण गुमेर दुर्घटना भएको प्रारम्भिक अनुमान प्रहरीले जनाएको छ। मृतक दुवै जनाको शव पोस्टमार्टमका लागि भरतपुर अस्पतालमै राखिएको छ।