असोज ५, २०८२ काठमाडौं– सरकारले नेपाल प्रहरीका अतिरिक्त महानिरीक्षक (एआईजी) मनोज केसीलाई केन्द्रीय अनुसन्धान ब्युरो (सीआईबी) को प्रमुखमा नियुक्त गरेको छ। आइतबार बसेको मन्त्रिपरिषद् बैठकले केसीलाई सीआईबीको नेतृत्वमा ल्याउने निर्णय गरेको हो। नक्कली भुटानी शरणार्थी प्रकरणमा सक्रिय भूमिका खेलेका केसी यसअघि प्रहरीको प्रदेश समन्वय विभागमा कार्यरत थिए।

यसअघि सीआईबीको नेतृत्व गरेका चन्द्र कुवेर खापुङ प्रहरी महानिरीक्षकमा पदोन्नति भएपछि ब्युरो कार्यवाहक नेतृत्वमा सञ्चालन हुँदै आएको थियो। मनोज केसीले उक्त शरणार्थी प्रकरणमा अनुसन्धान गर्दै पूर्वगृहमन्त्री बालकृष्ण खाँणसहित उच्च पदस्थ व्यक्तिहरुलाई पक्राउ गर्ने प्रक्रियामा भूमिका निर्वाह गरेका थिए। सोही कारण उनी पछिल्लो एमाले–कांग्रेस गठबन्धन सरकारमा सक्रिय भूमिकामा देखिएका थिएनन्।