९ असार २०८३ काठमाडौं – सुदूरपश्चिम प्रदेश सरकारले ल्याएको आगामी आर्थिक वर्ष २०८३/८४ को बजेटप्रति सत्ता साझेदार दल नेकपा (एमाले) ले आपत्ति जनाएको छ। धनगढीमा सम्पन्न एमाले प्रदेश कमिटीको ११औँ पूर्ण बैठकले बजेटमा आवश्यक संशोधन नगरिए सरकारबाट बाहिरिने चेतावनी दिएको हो।

पार्टीका प्रदेश उपसचिव तथा प्रचार विभाग प्रमुख भागरथी विष्टद्वारा जारी विज्ञप्तिमा बजेट विनियोजन एकलौटी ढंगले गरिएको भन्दै गम्भीर असहमति जनाइएको छ। बैठकले बजेट संशोधनका लागि संसदीय दललाई आवश्यक निर्देशन दिने निर्णय गर्दै माग पूरा नभए संयुक्त सरकारमा सहभागी हुन नसकिने स्पष्ट पारेको छ।

एमाले सुदूरपश्चिमले बजेट निर्माणमा संयुक्त सरकारको भावना, साझा नीति तथा कार्यक्रम र आपसी सहमतिलाई बेवास्ता गरिएको निष्कर्ष निकालेको छ।