२२ साउन २०८३ काठमाडौं – साताको अन्तिम कारोबार दिन शुक्रबार नेपाल स्टक एक्सचेञ्ज (नेप्से) परिसूचक ४.०५ अंकले बढेर २ हजार ६५०.०९ बिन्दुमा पुगेको छ। यस दिन ३३४ कम्पनीको १ करोड २ लाख ९९ हजार कित्ता शेयर खरिद–बिक्री हुँदा कुल ३ अर्ब ७६ करोड ८८ लाख ७० हजार रुपैयाँ बराबरको कारोबार भएको नेप्सेले जनाएको छ।

कारोबारमा नेप्से परिसूचक सामान्य अंकले बढे पनि अधिकांश उपसूचक र कम्पनीको शेयर मूल्य भने ओरालो लागेको छ। १३ मध्ये ९ उपसूचक घटेका छन् भने ४ उपसूचकमा मात्रै सामान्य वृद्धि देखिएको छ। सबैभन्दा बढी गिरावट फाइनान्स समूहको उपसूचकमा देखिएको हो।

यसदिन ८६ कम्पनीको शेयर मूल्य बढ्दा १८४ कम्पनीको मूल्य घटेको छ। ६ कम्पनीको शेयर मूल्य भने स्थिर रहेको छ। समग्रमा परिसूचक हरियो रहे पनि बजारमा बिक्री दबाब कायम रहँदा अधिकांश कम्पनीको शेयर मूल्यमा गिरावट देखिएको छ।